Aldraðir með sjón- og heyrnaskerðingu

Aukum virkni aldraðra með skerta sjón eða  samþætta aldursbundna sjón-og heyrnarskerðingu (SASH); gagnleg ráð fyrir starfsfólk og aðstandendur.

Margir aldraðir með skerta sjón eða SASH þurfa stuðning til að vera virkir í félagsstarfi og hreyfingu og þar með að auka lífsgæði sín.

Þátttakendur fá ábendingar og gagnleg ráð um hvaða aðferðir gagnast best við að styðja hópinn til félagslegrar virkni og að taka ábyrgð á eigin heilsueflingu. Einnig verða veittar upplýsingar um hin ýmsu hjálpartæki sem nýtast markhópnum og úrræði sem standa þeim til boða. Þá verður einnig fjallað um ólíkar tegundir sjónskerðinga meðal aldraðra. 

Námskeiðið samanstendur af fimm þemum þar sem farið er yfir algengustu orsakir sjónskerðinga hjá öldruðum, samþætta aldurstengda sjón- og heyrnarskerðingu, aðlögun umhverfis til að bæta aðgengi, leiðsögn við áttun og rötun og að lokum  úrræði til að bæta félagslega virkni. 

Námskeiðið byggir á afurð evrópska samstarfsverkefnisins VAPETVIP, Virtual Academy for Professionals in Education and Training of Visually Impaired People. Markmið verkefnisins var m.a. að útbúa námsefni til að auka þekkingu og hæfni þeirra sem starfa með blindum og sjónskertum. Fulltrúi Íslands í evrópusamstarfinu var Þjónustu- og þekkingarmiðstöð fyrir blinda, sjónskerta og einstaklinga með samþætta sjón- og heyrnarskerðingu.